ពិធីបុណ្យសមុទ្រនឹងរៀបចំធ្វើនៅខេត្តកែប ចាប់ពី ថ្ងៃទី១ ដល់ថ្ងៃទី៣ ខែធ្នូ

ក្រសួងទេសចរណ៍បានបញ្ជាក់ថា ពិធីបុណ្យសមុទ្រឆ្នាំនេះនឹងរៀបចំធ្វើនៅថ្ងៃទី១ ដល់ថ្ងៃទី៣ ខែធ្នូ នៅខេត្តកែប។ ឆ្នាំនេះជាលើកទី១០ដែលប្រទេសកម្ពុជានឹងរៀបចំពិធីបុណ្យសមុទ្រ និងជាលើកទី៣ដែលខេត្តកែបធ្វើជាម្ចាស់ផ្ទះរៀបចំពិធីបុណ្យមួយនេះ។

ខេត្តកែបជាខេត្តមួយក្នុងចំណោមខេត្តទាំង៤ដែលស្ថិតនៅតាមឆ្នេរសមុទ្រភាគនិរតីនៃប្រទេស។

ការបញ្ជាក់ពីកាលបច្ឆេទរៀបចំពិធីបុណ្យសមុទ្រនេះធ្វើឡើងនៅក្នុងកិច្ចប្រជុំមួយទាក់ទងនឹងការងាររៀបចំពិធីបុណ្យសមុទ្រនៅខេត្តកែបកាលពីថ្ងៃចន្ទ។

លោក សុខ សូកេន រដ្ឋមន្ត្រីក្រសួងទេសចរណ៍ និងជាប្រធានគណ:កម្មការអន្តរក្រសួងរៀបចំពិធីបុណ្យសមុទ្រលើកទី១០ បានដឹកនាំកិច្ចប្រជុំនេះជាមួយក្រសួងស្ថាប័ន្ធពាក់ព័ន្ធ ដើម្បីត្រួតពិនិត្យលើផែនការរៀបចំពិធីបុណ្យសមុទ្រ។

លោក សុខ សូកេន រដ្ឋមន្រ្តីក្រសួងទេសចរណ៍ បានលើកឡើងថា ឆ្លងកាត់ពិធីបុណ្យសមុទ្រលើកនេះសម្រាប់ខេត្តកែបជំរុញនិងលើកកម្ពស់វិស័យទេសចរណ៍កាន់តែមានភាពមមាញឹកបន្ថែមទៀតតាមរយៈការផ្សព្វផ្សាយបន្ថែមទៅកាន់អ្នកទេសចរអំពីសក្តានុពលដែលខេត្តមានក្នុងពិធីបុណ្យសមុទ្រនាពេលខាងមុខនេះ។

លោកបានដាក់គោលដៅរៀបចំពិធីបុណ្យសមុទ្រលើកនេះ គឺត្រូវតែមានភាពសប្បាយរីករាយនិងអស្ចារ្យតាមរយៈការបង្កើតកម្មវិធីសប្បាយផ្សេងៗ សកម្មភាពកម្សាន្តចម្រុះ ទាំងពេលថ្ងៃនិងពេលយប់ចាប់ពីថ្ងៃទី១ ដល់ទី៣ ខែធ្នូ ឆ្នាំ២០២៣។

លោករដ្ឋមន្ត្រីរំពឹងថា៖ «បុណ្យសមុទ្រនៅខេត្តកែបនឹងប្រព្រឹត្តទៅដោយភាពសប្បាយរីករាយនិងបញ្ចប់ទៅវិញដោយទទួលបានលទ្ធផលជោគជ័យជាមួយការចងចាំពីសំណាក់អ្នកចូលរួមមកគ្រប់ពីមជ្ឈដ្ឋានក្នុងចំនួនយ៉ាងច្រើន»។

លោក វ៉ៅ សុខា អ្នកនាំពាក្យខេត្តកែបបានលើកឡើងថា រដ្ឋបាលខេត្តកែបកំពុងតែខ្នះខ្នែងដើម្បីរៀបចំពិធីបុណ្យសមុទ្រក្រោមការចង្អុលបង្ហាញពីថ្នាក់ដឹកនាំតាមរយៈកិច្ចប្រជុំទាក់ទងនឹងការរៀបចំបុណ្យសមុទ្រ។

លោកបន្តថា ការរៀបចំពិធីបុណ្យសមុទ្រលើកនេះក៏មិនខុសពីលើកមុនដែរ គឺរដ្ឋបាលខេត្តបានណែនាំដល់ពលរដ្ឋត្រៀមលក្ខណៈដើម្បីទទួលភ្ញៀវក្នុងពិធីបុណ្យសមុទ្រដែលត្រូវបានរំពឹងនឹងទាក់ទាញទេសចរមកកម្សាន្តច្រើន។

លោកបាននិយាយថា៖ «រដ្ឋបាលខេត្តនឹងសហការជាមួយស្ថាប័នពាក់ព័ន្ធក្នុងការរៀបចំរក្សាសន្តិសុខ សណ្ដាប់ធ្នាប់ និងចរាចរណ៍ឱ្យបានល្អប្រសើរ ហើយយើងកំពុងមានយុទ្ធនាការផ្សព្វផ្សាយពីភាពទាក់ទាញទេសចរណ៍នៅក្នុងខេត្តយើង»។

ក្រសួងទេសចរណ៍បានសរសរលើទំព័រហ្វេសប៊ុកផ្លូវការថា ពិធីបុណ្យសមុទ្រប្រចាំឆ្នាំនៅកម្ពុជា គឺជាប្រពៃណីដ៏គួរកត់សម្គាល់ចាប់តាំងពីតំបន់ឆ្នេរសមុទ្រដ៏គួរឱ្យទាក់ទាញរបស់កម្ពុជាត្រូវបានបញ្ជូលជាសមាជិកពេញសិទ្ធិក្លិបឆ្នេរសមុទ្រដែលស្អាតបំផុតលើសកលលោកនៅក្នុងអង្គមហាសន្និបាត លើកទី៧ កាលពីថ្ងៃទី២៦ ខែឧសភា ឆ្នាំ២០១១ នៅក្រុងតូបាកូតា (Tobacouta) ប្រទេសសេណេហ្គាល់ (Senagal) ក្រោមឈ្មោះរួមតែមួយ គឺឆ្នេរសមុទ្រកម្ពុជា (Cambodia Bay) ហើយត្រូវបានប្រសិទ្ធនាម “ឆ្នេរសមុទ្រកម្ពុជា៖ តារារះនាទិសនិរតី“។

អ្នកស្រី ឃឹម វួចអាយ ប្រធានសហគមន៍ទូកទេសចរណ៍ខេត្តកែប បានលើកឡើងថា ស្ថានភាពទេសចរមកលេងនៅខេត្តកែបហាក់មានសភាពស្ងប់ស្ងាត់ដោយសារតែកត្តាអាកាសធាតុអាប់អួរពេក ហើយលោកស្រីក៏មិនរំពឹងថា នឹងមានភ្ញៀវមកកម្សាន្តច្រើននៅខេត្តកែបកំលុងពេលបុណ្យសមុទ្រដែរ ប្រសិនបើអាកាសធាតុអាក្រក់នៅតែអូសបន្លាយរហូតដល់ពេលនោះ។

ទោះបែបនេះក្ដី អ្នកស្រីបានអះអាងថា៖ «រដ្ឋបាលខេត្តកែប ជាពិសេសខាងមន្ទីរទេសចរណ៍បានប្រឹងប្រែងជួយអាជីករខ្លាំងណាស់ក្នុងការផ្ដល់សេវាទេសចរណ៍ដល់ភ្ញៀវដែលបានមកកម្សាន្តនៅខេត្តកែប។ ពួកគេថែមទាំងបានបណ្ដុះបណ្ដាលពីរបៀបធ្វើបដិសណ្ឋាកិច្ចជាមួយភ្ញៀវជាដើម»។

ពិធីបុណ្យសមុទ្រត្រូវបានរៀបចំជាលើកដំបូងនៅឆ្នាំ២០១១ ក្នុងខេត្តព្រះសីហនុ ដើម្បីអបអរសាទរឆ្នេរសមុទ្រកម្ពុជាចូលជាសមាជិកក្លិបឆ្នេរសមុទ្រដែលស្អាតបំផុតលើសកលលោក៕